Den un mundu kaminda nos muchanan ta representá futuro, UNICEF Hulanda den koperashon ku Entidatnan Públiko ta lansa un kampaña yamá ‘Raising our Future’. E kampaña tin komo meta pa inspirá hende pa hasi kambionan positivo den e edukashon di muchanan, pa inisiá kombersashon i pa promové un sentido di komunidat entre mayornan i kuidadónan.
E kampaña ta inspirá pa e ekspreshon "it takes a village to raise a child". Esaki ta enfatisá ku nos ta forma nos futuro pa medio di nos muchanan i e importansha di traha huntu komo komunidat pa kuidá e siguiente generashon.
E kampaña “Raising our Future” a wòrdu traha pa stimulá kombersashon tokante edukashon i tur e responsabilidatnan, desafionan i tambe e alegria ku esaki ta trese kuné. E meta ta pa enfatisá e interesnan komun ku edukadónan ta kompartí i pa fomentá edukashon mas efektivo i positivo. Ku e kampaña aki e organisashon di derechonan di mucha ta desea di duna sosten na edukadónan pa nan sinti nan mes fuerte i mas sigur di nan mes miéntras nan ta traha huntu pa krea un mihó futuro pa e muchanan.
Algun di e metanan prinsipal di 'Raising our Future' ta:
● Enfatisá e interés komún den edukashon positivo: E kampaña ke enfatisá ku mayornan i kuidadónan, sin importá di unda nan ta bini, ta kompartí un interes komun den edukashon positivo i den e kuido di e siguiente generashonnan.
● Krea konsientisashon tokante un meta konhunto pa futuro: 'Raising our Future' ta rekòrdá nos ku nos yunan ta e kargadónan di antorcha di nos futuro komún, i ta esensial pa nos traha huntu pa ofresé nan e mihó edukashon posibel.
● Stimulá konfiansa personal i un sintimentu di sostén di komunidat: E kampaña tin komo meta pa oumentá konfiansa di mayornan i kuidadónan, i sigurá nan ku nan no ta nan so i ku nan tin e sosten di nan komunidat.
● Deskubrí e poder di ‘un’: Skohe edukashon positivo, paso pa paso ku e sosten di un komunidat uní. Tin biaha un kambio chikí den bo komportashon por tin un impakto grandi.
Tópikunan ku e kampaña lo trata ta inkluí edukashon, pasa tempu balioso ku bo yu, disiplina positivo, e interesnan komún ku ta uni nos komo edukadó i e efektonan positivo tantu físiko komo mental di un edukashon yena ku amor.
Komo parti di e kampaña lo graba mini dokumentalnan kaminda famianan lokal lo wórdu filmá. Tambe lo organisá un obra di teatro pa mayornan i profeshonalnnan, i lo kompartí inspirashon di habitantenan pa medio di diferente kanalnan.
E kampaña ta un kolaborashon entre UNICEF Hulanda i e Entidatnan Públiko di Boneiru, Sint Eustatius i Saba. Tambe e ta forma parti di e programa BES di UNICEF ku ta wòrdu hasi posibel dor di Ministerio di Asuntu Interior i Relashon den Reino. E kampaña aki a wòrdu desaroyá huntu ku mayornan i profeshonalnan di Boneiru, Sint Eustatius i Saba na ingles, hulandes i papiamentu.